महाराष्ट्राच्या कानाकोपऱ्यातून ९७ दिंड्या दाखल
चांदूर रेल्वे / शहेजाद खान /-
१३ व्या शतकातील श्री.संत बेंडोजी महाराज यांच्या संजिवन समाधीचे दर्शन महाराष्ट्राच्या कानाकोपऱ्यातील लाखो भाविक भक्तांनी आज घेतले. आजच्या भव्यदिव्य दहिहांडी महोत्सवात लाखो भक्त सामिल झाले होते. श्री.संत बेंडोजी महाराजाच्या ऐतिहासीक पालखी सोहळयात संपूर्ण महाराष्ट्रातील ९७ दिंड्या सामील झाल्या. लेझीम, बँड, भजने व हरिनामाच्या गजराने संपूर्ण घुईखेड नगरी दुमदूमली होती.
तालुक्यातील घुईखेड येथील श्री.संत बेंडोजी महाराजाच्या संजिवन समाधी महोत्सवाला २८ जानेवारी ला प्रारंभ झाला. तिर्थ व कलश स्थापना करून श्री संत बेंडोजी महाराजांचा लघुरूद्राभिषेक संस्थानचे अध्यक्ष वसंतराव घुईखेडकर यांच्या हस्ते करण्यात आला. २८ जानेवारी ते ४ फेब्रुवारी सलग सात दिवस हभप गोदावरीबाई बंड यांनी आपल्या अमृतवाणीतुन सुंदर भागवत प्रवचण केले. दररोज सामुदायिक प्रार्थना, काकडा आरती, ग्रामसफाई, रामधुन, किर्तनाचा कार्यक्रम उत्साहात पार पडला. तर दररोज रात्री हभप नामदेव महाराज, हभप मोहोड महाराज, हभप विजय महाराज गव्हाणे, योगेश महाराज खवले यांचे हरिकिर्तन झाले. त्यांचा आनंद भाविकांनी लुटला. बजरंग मंडळ, गुरूदेव सेवा मंडळ व बाल भजनी मंडळ, घुईखेड, भजनी मंडळ, पळसखेड, वारकरी भजनी मंडळ जावरा, वारकरी महिला भजनी मंडळ, घुईखेड, वारकरी भजनी मंडळ निमगव्हाण यांचा खंजेरी भजनाचा कार्यक्रम पार पडला.या संपूर्ण सप्ताहात भाऊसाहेब घुईखेडकर, आप्पासाहेब काकडे, श्रीमती कमलाबाई सवाने, हरिभाऊ ठाणेकर, किशोर कडवे, भिमराव वानखडे, संजय कुचेवार, त्रिलोक टावरी आदी दात्यांनी अन्नदान केले.
काल्याचे किर्तन व महाप्रसाद
आज शनिवारी (ता.४) सकाळी श्री.संत बेंडोजी महाराजांची भव्य सामुहिक आरतीने कार्यक्रमाची सुरूवात झाली. ४ फेब्रुवारीला हभप उमेश महाराज जाधव (आळंदी) यांचे काल्याचे किर्तन झाले. श्री संत बेंडोजी महाराज यांच्या भव्य दिव्य पालखी सोहळयाला सुरूवात झाली. यामध्ये घुईखेड येथील बेंडोजी बाबा विद्यालयाच्या दिंडीसह नगर, बिड, वर्धा, नांदेड, यवतमाळ यासह महाराष्ट्रातील कानाकोपऱ्यातील आलेल्या महिला व पुरूषांच्या ९७ दिंड्या सहभागी झाल्या होत्या. लेझीम, बँड व भजनाच्या गजरात, हरिनामाच्या जयघोषात हा ऐतिहासीक पालखी सोहळा संस्थानच्या शेतामध्ये पोहचला. परंपरेनुसार शंभर वर्षापुर्वीच्या चिंचीच्या झाडाजवळ दहिहांडीचा कार्यक्रम उत्साहात पार पडला. या दहीहांडीचा लाभ लाखो भाविक भक्तांनी घेतला.दंहिहांडी नंतर महाप्रसादाचा कार्यक्रम घेण्यात आला. तर आज रात्री उद्या विदर्भस्तरिय खंजेरी भजन स्पर्धा होणार आहे. या कार्यक्रमाला अमरावती जि.प.सदस्य प्रविणभाऊ घुईखेडकर, संस्थान अध्यक्ष वसंतराव घुईखेडकर, कोषाध्यक्ष दिनकरराव घुईखेडकर, सचिव बाळासाहेब देशमुख, सदस्य विजय घुईखेडकर, विवेक घुईखेडकर, शशिकांत चौधरी यासह गावकरी मंडळी व लाखो भाविक सामिल झाले होते. यात्रेत आकाश पाळणा, टुरींग टॉकीज यासह लोकपयोगी
विविध साहित्यांची दुकाने सजली होती. यात्रेकरू संसारपयोगी वस्तुची खरेदी करतांना दिसले. तर अनेकजन यात्रेत आकाश पाळण्यासह इतर मनोरंजनाच्या खेळांचा आनंद घेतांना दिसले.
पोलीसांचा चोख बंदोबस्त
या संपुर्ण सोहळ्याचा तळेगाव दशासर पोलीस स्टेशनचे ठाणेदार ए.डी.सुराडकर, दुय्यम ठाणेदार शिवाजी राठोड, बिट जमादार वसंत राठोड व त्यांच्या सहकार्यानी चोख बंदोबस्त ठेवला होता. घुईखेड यात्रेसाठी चांदूर रेल्वे आगाराचे आगार व्यवस्थापक धजेकर यांनी जादा एसटी बसेसची व्यवस्था केली होती.
Post a Comment