नांदगाव पेठ/मंगेश तायडे /-
अमरावती येथील कार्यक्रम आटोपून नांदगाव पेठ येथे जाणाऱ्या दाम्पत्याच्या दुचाकीस मागून येणाऱ्या भरधाव ट्रकने जबर धडक दिल्याची घटना सोमवारी दुपारी दोन वाजताच्या सुमारास महामार्गावरील सिटीलँड नजीक घडली. घटनेत पत्नीचा जागीच मृत्यू झाला तर पती आणि दोन मुले गंभीर जखमी झाले आहेत.
नांदगाव पेठ (माळीपुरा)येथील भाजप कार्यकर्ते आणि शेतकरी रवींद्र बाबाराव राऊत (४३) हे आपली पत्नी आणि दोन मुलांसमवेत दुचाकी क्रं एम एच २७, ए बी ६४८३ ने अमरावती येथील एका कार्यक्रमासाठी गेले होते. दुपारी दोन वाजताच्या दरम्यान राऊत दाम्पत्य घरी परत येत असतांना महामार्गावरील सिटीलँड समोर मागून भरधाव येणाऱ्या ट्रक क्रं जि जे २७,व्ही ९९७५ ने दुचाकीस जबर धडक दिली.यामध्ये सौ. ज्योती रवींद्र राऊत(३२)यांच्या डोक्याला गंभीर इजा झाल्याने त्यांचा जागीच मृत्यू झाला तर रवींद्र राऊत, अनुज रवींद्र राऊत(८),सोहम रवींद्र राऊत(१०) हे तिघेही गंभीररित्या जखमी झालेत.
जखमींना त्वरित उपचारासाठी जिल्हा सामान्य रुग्णालयात हलविण्यात आले.घटनास्थळावर बघ्यांची एकच गर्दी झाली होती. नांदगाव पेठ पोलिसांनी घटनेची दखल घेत ट्रकचालकाला त्वरित ताब्यात घेतले.घटनेने राऊत कुटुंबावर काळाचा डाव साधला असून नांदगाव पेठ मध्ये सर्वत्र शोककळा पसरली आहे. पुढील तपास सुरु आहे.
Post a Comment