कोपर्डी घटनेचा निषेध करण्यासाठी चिपळूणमध्ये १६
ऑक्टोबर रोजी मराठा क्रांती मूकमोर्चा काढण्याचा निर्णय येथे झालेल्या
जिल्ह्याच्या बैठकीत एकमुखाने घेण्यात आला .यावेळी सर्वांनी ‘एक मराठा-लाख
मराठा’ अशा गगनभेदी घोषणा देऊन सभागृह दणाणून सोडले.राज्यात प्रत्येक जिल्ह्यात मराठा समाजाचे दणदणीत मोर्चे काढले जात आहेत. त्यामुळे रत्नागिरी जिल्ह्यातही मोर्चा केव्हा काढावा व त्याचे नियोजन करण्यासाठी चिपळुणात रविवारी दि. २५ रोजी सकाळी अकरा ते एक वाजेपर्यंत जिल्ह्यातील ज्ञातीबांधवांची बैठक झाली. या बैठकीत मोर्चा रत्नागिरीत काढावा की चिपळूणमध्ये यावर चर्चा झाली तेव्हा राजापूर व रत्नागिरी येथील प्रतिनिधींचा अपवाद वगळता सर्वांनी जिल्ह्याच्या दृष्टीने मध्यवर्ती असलेल्या चिपळुणात मोर्चा काढा, अशी मागणी केली. त्यानंतर एकमुखाने चिपळूणमध्ये मोर्चा काढण्यावर सर्वांनी मान्यता दिली आणि मोर्चासाठी १६ ऑक्टोबर ही तारीख निश्‍चित करण्यात आली. या मोर्चात जिल्हाभरातून सुमारे ५ लाख मराठा बांधव सहभागी होणार आहेत.
या दिवशी पवन तलाव मैदानावर शिवरायांच्या पुतळ्याला अभिवादन करून सकाळी ११ वाजता मोर्चाला सुरुवात होईल. पवन तलाव येथून कराड रोडवरून बहादूरशेख मार्गे डीबीजे महाविद्यालयाकडून हा मोर्चा प्रांत कार्यालयावर धडकेल. तेथे जिल्हाधिकार्‍यांना सकल मराठा समाजाचे निवेदन दिले जाईल आणि काही वक्त्‌यांचे मार्गदर्शन होऊन मोर्चाची सांगता होईल.
बैठकीला सर्व क्षेत्रातील मराठा समाज बांधव, भगिनी आणि कॉलेज युवक-युवती मोठ्या संख्येने उपस्थित होते. हॉलमध्ये तुडुंब गर्दी झाल्याने बैठक झालेल्या हॉटेलच्या दुसर्‍या मजल्यावर प्रोजेक्टरची व्यवस्था करून तेथेही बसण्याची सोय करण्यात आली होती. आ. सदानंद चव्हाण, माजी आमदार रमेश कदम सुभाष बने, रवींद्र माने, तसेच शेखर निकम, सचिन कदम, बाळा कदम, डॉ. तानाजी चोरगे, रामदास राणे, बाबाजी जाधव, केशव भोसले, विजय कदम, भाऊ जगताप, महिलांमध्ये पूजा निकम, चित्रा चव्हाण या प्रमुख मंडळींची यावेळी उपस्थिती होती.
Post a Comment